Novas acçons directas contra a simbologia fascista em Neda e Fene
(NÓS-Unidade Popular) [26.12.2005]

http://www.kaosenlared.net/noticia.php?id_noticia=14290

Filiados e filiadas de NÓS-Unidade Popular na comarca de Trasancos continuárom na manhá de hoje com a série de acçons directas que a nossa organizaçom está a desenvolver nos últimos meses ao longo do País contra símbolos do franquismo. Em concreto, duas "cruzes dos caídos" em pedra e de grandes dimensons fôrom totalmente cobertas de tinta cor-de-rosa nos concelhos de Neda e Fene, respectivamente.

Os actos, como todos os incluídos na campanha "Simbologia fascista fora da Galiza. Higiene, justiça e dignidade democrática", fôrom públicos, com convocatória prévia e realizados ao meio-dia, à vista de quem quijo vê-lo. No primeiro caso, em Neda, um carro da Polícia municipal chegou-se ao local no momento em que a cruz e a legenda de exaltaçom fascista eram pintadas, e os polícias identificárom @s independentistas ali presentes. No caso de Fene, a cruz, construída no ano 1953, encontra-se no adro da Igreja de Perlio, e inclui o escudo franquista e o jugo e as flechas da Falange. Nom só constitui umha perfeita mostra da simbiose nacional-católica entre a Igreja e o Estado fascista durante quatro décadas de ditadura criminosa, como também exemplifica o desinteresse da Igreja e das instituiçons públicas em fazer desaparecer esses vestígios do fascismo que inçam espaços e edifícios públicos da Galiza. Também ela ficou coberta de tinta cor-de-rosa, a cor do antifascismo galego.

Há que lembrar que, em ambos os casos, há já várias semanas que a nossa organizaçom apresentou duas moçons municipais reclamando a retirada desses e outros símbolos fascistas de Neda e Fene. Nengum dos dous governos municipais, o primeiro em maos do PSOE e IU, nem o segundo em maos do BNG, respondêrom aos requerimentos de NÓS-Unidade Popular. No caso de Neda, existe há já muitos anos a decisom plenária de proceder à eliminaçom desses símbolos, sem que até hoje fosse cumprida, apesar do qual a própria Izquierda Unida propujo em dias passados isso mesmo no vizinho concelho de Ferrol.

Daí que, dando cumprimento ao desenvolvimento da campanha antifascista em curso, a nossa organizaçom decidisse actuar directamente contra dous dos principais símbolos franquistas de Neda e de Fene. Naturalmente, informaremos da reacçom de ambas cámaras municipais ante esta iniciativa de NÓS-Unidade Popular, incluída a decisom que o PSOE e IU podam tomar em Neda em relaçom à identificaçom por parte da Polícia local de vári@s independentistas na manhá de hoje.

De resto, NÓS-UP vai continuar ainda a sua campanha, que já serviu para eliminar numerosas placas e outros símbolos fascistas, bem como para denunciar a permanência de outros em diversos pontos da Galiza, como hoje aconteceu em Neda e Fene, na comarca de Trasancos.