Reunidos en territorios da antiga freguesía de Bando, Compostela, os socios de Redes Escarlata X. Antón L. Dobao, Antón Figueroa, Francisco Fdz. Rei, Rosa López, Darío Xohán Cabana e o que labra esta acta, X.L. Méndez Ferrín, o día 26 de Maio do ano 2007, proceden a se constituír en xuri do Premio Roberto Vidal Bolaño e, tras fonda deliberación acordan outorgar dito Premio Vidal Bolaño a DIONISIO PEREIRA e VERBO XIDO.
Tivéronse en conta para esta escolla a longa traxectoria do premiado nos estudos de historia contemporánea, pola súa dedicación á reconstrución de todas as formas de abxección feixista e dos crimes perpetrados contra os fillos e fillas do pobo galego así como o seu intenso labor no asociacionismo e na impulsión de entidades culturais que, como VERBO XIDO, se caracterizan polo seu servizo á cultura popular e nacional.
As Redes Escarlata farán entrega do galardón o día 23 deste mes, en Cerdedo. A xornada abrirase ás 12 da mañá cunha conferencia a cargo de Anxo Angueira no Local da Cámara Agraria, co título "Asociacionismo e memoria política". Posteriormente, durante o xantar, entregarase o IV Premio Vidal Bolaño a Verbo Xido e a Dionisio Pereira, xunto cun cadro do artista ourensán Xosé Luís de Dios.
Actualizado: 12/06/2007
http://www.redesescarlata.org/
culturagalega.org, 13-6-07
Dionisio Pereira leva o premio Vidal Bolaño mentres continúa a recibir apoios
O colectivo Redes Escarlata outorgoulle ao historiador Dionisio Pereira e mais á asociación Verbo Xido, que el fundou, o premio Roberto Vidal Bolaño. A entrega do galardón farase o vindeiro día 23 en Cerdedo, nun acto que quere apoiar o investigador na demanda que ten aberta por sinalar os responsables da represión franquista nesta vila. Ao tempo, continúan as adhesións ao manifesto que reclama a fin do proceso contra Pereira.
http://www.culturagalega.org/noticia_arquivo.php?id=10143